Njarðvík valtaði yfir Breiðablik er liðin mættust í úrvalsdeild karla í körfubolta í Njarðvík í kvöld. Urðu lokatölur 120:86.
Njarðvík er nú ein í öðru sæti með 30 stig, tveimur stigum á eftir toppliði Vals og tveimur stigum á undan grönnum sínum í Grindavík og Keflavík. Er Njarðvík í góðri stöðu í baráttunni um heimaleikjarétt í úrslitakeppninni. Breiðablik er í 11. sæti með aðeins fjögur stig.
Njarðvíkingar hafa verið í baráttunni um efstu sætin stóran hluta tímabils en Breiðablik er fallið úr deildinni. Bjuggust því flestir við sigri Njarðvíkinga, sem var gríðarlega öruggur.
Var staðan í hálfleik 73:48 og eftirleikurinn auðveldur fyrir Njarðvíkinga í seinni hálfleik.
Dwayne Lautier-Ogunleye skoraði 27 stig fyrir Njarðvík og Chaz Williams gerði 24 stig og gaf tíu stoðsendingar. Zoran Vrkic skoraði 20 stig fyrir Breiðablik og Ólafur Eyjólfsson gerði 19.