Keflavík er númer eitt og lífið er geggjað

„Lífið er geggjað. Keflavík er númer eitt og þetta er frábært,“ sagði Sara Rún Hinriksdóttir, landsliðskona og leikmaður Keflavíkur, í samtali við mbl.is eftir að hún varð bikarmeistari í kvöld.

Keflavík vann öruggan 89:67-sigur á Þór í bikarúrslitum í Laugardalshöll og hafði undirtökin nánast alveg frá byrjun.

Frétt af mbl.is

Keflavík bikarmeistari í 16. skipti

„Mér leið vel. Við erum með svo rosalega gott lið og allir geta skorað. Við þurfum að hafa fyrir öllu og allir þurftu að leggja sitt að mörkum í dag. Við vorum mjög flottar í leiknum í dag,“ sagði hún.

Keflavík er með tíu stiga forskot á toppi úrvalsdeildarinnar og nú bikarmeistari. Er liðið það langbesta á landinu í dag.

„Við erum með flottan og samstíga hóp. Það er ekki ein stjarna, heldur margar stjörnur. Við stígum upp í mismunandi leikjum. Stigaskorið er dreift og við erum gott lið,“ útskýrði Sara.

Keflavík varð einnig bikarmeistari í karlaflokki, með sigri á Tindastóli fyrr í dag.

„Við vorum mjög ánægðar fyrir þeirra hönd en svo þurftum við að einbeita okkur að okkar leik. Við náðum í sigur, sem er frábært,“ sagði Sara.

• Blogga um frétt