Laxá í Dölum opnaði í morgun

Laxá í Dölum opnaði í morgun og þar fer veiði vel af stað í byrjun eins og hefur verið í nánast öllum veiðiám landsins.

Að sögn Haraldar Eiríkssonar hjá veiðifélaginu Hreggnasa, sem staddur var í Laxá í Kjós, fékk hann upplýsingar um það skömmu áður að 11 löxum hefði verið landað á morgunvaktinni.  Það væri með bestu opnunum í Laxá í fjöldamörg ár.  Laxarnir munu hafa veiðst vítt og breitt um ána og voru allt að 90 cm langir.

Að auki kom fram hjá Haraldi að vel gengi í Laxá í Kjós þó svo leiðinda vestanátt hafi verið síðustu daga sem aðeins hafi dregið úr veiðinni. Smálaxinn væri byrjaður að sjást og virðist hann almennt koma vel úr hafi eins og stórlaxinn.

Prýðisgott vatn væri í ánni og mikil ferð á laxinum upp ána og gengi Laxfoss auðveldlega.  Sem dæmi hafi menn veitt grálúsuga laxa á Ósbreiðu efst í Bugðu uppi við Meðalfellsvatn. Fram kom að lax væri byrjaður að veiðast í vatninu og sagðist Haraldur hafa heyrt af alla vega tveimur á land þar síðustu daga. 

Frá Laxá í Dölum í morgun. hreggnasi.is

Frá Laxá í Dölum í morgun. Hreggnasi.is

• Blogga um frétt

Seinustu hundraðkallar sumarsins