Lax genginn á efri svæðin í Fnjóská

Fram kemur hjá Stangveiðifélaginu Flúðum, sem annast leigu á Fnjóská, að lax sé byrjaður að veiðast á efri svæðum árinnar.

Fnjóská er vatnsmikil dragá og á neðsta svæðinu við Laufásfossa er laxastigi sem þó er farartálmi þar til áin hefur fallið talsvert í vatni.

Síðustu daga hafa menn séð töluvert af laxi á göngu á fossasvæðinu fyrir neðan stiga skammt ofan við svokallaðan Kolbeinspoll. Áin hefur einnig farið hríðlækkandi dag frá degi og því var aðeins orðið tímaspursmál hvenær vart yrði við fyrstu laxana á efri svæðunum eftir að stiginn var orðinn fær.

Það var svo í gærmorgun að fyrsti laxinn veiddist fyrir ofan stiga og var það 82 cm hrygna sem veiddist í Ferjupolli á svæði 2. Veiðimaðurinn setti í annan lax af svipaðri stærð en missti hann eftir stutta baráttu.

• Blogga um frétt

Seinustu hundraðkallar sumarsins