Orri Vigfússon er formaður Laxárfélagsins sem hefur um áratuga skeið annast leigu á Laxamýrarsvæðinu í Laxá í Aðaldal. Sendi Orri eftirfarandi pistil og myndir um tvær drottningar sem voru á ferð þar fyrir stuttu.
Eitt gjöfulasta og dýrmætasta laxveiðisvæði veraldar er án efa Æðarfossar í landi Laxamýrar í Aðaldal og áin oft nefnt drottning íslenska laxveiðiáa. Þar fer allt saman, einstök náttúra, góð veiði og fagurt mannlíf. Mörgum finnist það forréttindi að fá að veiða á þessu svæði og þá ekki síst með því að eiga aðild að Laxárfélaginu, sem hefur skipulagt þessar veiðar í 76 ár.
Í vikunni voru tvær drottningar félagsins að renna fyrir lax og myndirnar sýna Ólöfu Nordal innanríkisráðherra og Dóru dóttur hennar sem fylgist með móður sinni sveifla stönginni í hvíld frá daglegum erli stjórnsýslunnar. Myndin er tekin þegar þær mæðgur voru að veiðum í Bjargstreng en í baksýn má sjá beljandann í Stórafossi en ljóðrænn dynur fossins sem líkja má við hljómkviðu eftir Mozart sést ekki á mynd!
Eins og myndirnar sýna fylgdist Dóra með hverri hreyfingu og einbeitni Ólafar við veiðarnar, hvatti hana og veitti góð ráð, lifði sig inn í augnablikið. Allt í kring er gróðurinn og iðandi fuglalífið sem gerir náttúruna svo sérstaka í og við Laxá.
Enskur ritstjóri hjá Beaverbrook pressunni sem veiddi við Æðarfoss fyrir nokkrum árum sagði: "This must be the best place in the world to catch a salmon." Þetta hlýtur að vera besti veiðistaðurinn í víðri veröld! Það eru orð að sönnu. Laxá og Mývatn eru einstakar perlur sem verður að vernda og þá mega menn ekki vera nærsýnir á pyngjuna. Hér voru æskuslóðir Jóhanns Sigurjónssonar skálds. Var það ekki hann sem sagði að fjarlægðin gerði fjöllin blá og mennina mikla?
Lengd á laxi | Veiðisvæði | Veiðimaður | Dagsetning Dags. |
---|---|---|---|
102 cm | Hvítá við Iðu | Ársæll Þór Bjarnason | 19. september 19.9. |
101 cm | Víðidalsá | Stefán Elí Stefánsson | 4. september 4.9. |
101 cm | Laxá í Dölum | Hafþór Jónsson | 27. ágúst 27.8. |
102 cm | Haukadalsá | Ármann Andri Einarsson | 23. ágúst 23.8. |
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |