Stærsti lax sumarsins á land í Aðaldal

Síðdegis í dag veiddist stærsti lax það sem af er sumrinu á svæði Laxárfélagsins í Laxá í Aðaldal, á svokallaðri Breiðeyri fyrir landi Jarlsstaða og Hjarðar­haga.

Veiðimaðurinn var rússneskur og heitir Stanislav Danelyan og náði að landa laxinum undir styrkri handleiðslu feðganna Jóns Helga Vigfússonar og Vigfúsar Jónssonar á Laxamýri. Reyndist laxinn 112 cm langur þegar honum var loks landað eftri mikla baráttu, en laxinn tók fluguna Hairy Mary Gray númer 6.

Á kvarða hinnar gömlu Veiðimálastofnunar yfir lengd laxa er hægt að áætla þyngd þeirra út frá lengdinni og væri þessi lax á þeim kvarða 13,8 kíló eða nálægt 28 pundum.

Breiðeyri er fallegur veiðistaður neðan við eyjuna Ófærusker þar sem allbreið vík sker sig inn í vesturbakkann.  Þarna eru nokkrar fallegar og fjölskrúðugar eyjar og undanfarin ár hefur verið jöfn og góð veiði í ágúst og september á þessum veiðisvæðum, sérstaklega á Breiðeyri.

Mikið hefur verið um stórlax á veiðisvæðum Laxárfélagsins í sumar og hefur verið algengt að fá 20 til 25 punda laxa að sögn Orra Vigfússonar hjá félaginu.

Áður höfðu tveir 108 cm laxar komið á land, annar sem Eric Clapton veiddi í Vatnsdalsá í byrjun ágúst og hinn veiddi enskur veiðimaður á Nessvæðinu í Laxá í Aðaldal undir lok júlí.

Seinustu hundraðkallar sumarsins