Lífleg sjóbirtingsveiði í Skaftafellssýslu

Samkvæmt upplýsingum frá sjóbirtingssvæðum í Vestur-Skaftafellssýslu hefur veiði almennt verið mjög góð þar í sumar og haust en á flestum stöðum er veitt til 20. október.

Fram kom í samræðum við Hörð Hauksson á Kálfafellskoti, sem annast sölu veiðileyfa í Laxá og Brúará í Fljótshverfi, að rúmlega 80 birtingar hafi komið á land á tvær stangir. Veiðitíminn þar er stuttur og byrjar fyrstu dagana í september og aðeins veitt fjóra til fimm daga í viku. Mjög góð veiði væri búin að vera að undanförnu, en mikil flóð eftir rigningartíð hafa þó sett aðeins strik í reikninginn.

Mikill fiskur væri í ánum sem virðast þar með vera að ná sér að fullu eftir Grímsvatnagosið árið 2010 þegar gríðarlegt öskufall fór illa með þær og hafði áhrif á veiði þar í nokkur ár. Venju samkvæmt veiðist best í ármótunum við Garðinn svokallaða, en þar renna árnar saman síðasta spottann út í jökulána Djúpá og veiðist jafnan best þar í skilunum. Hörður sagði að veitt yrði til 20. október enda gengur sjóbirtingur lengi fram á haustið og nokkrir dagar væru óseldir.

Að sögn Ragnars Johnsen á Hörgslandi hefur veiðin í Vatnamótunum í Skaftá verið með því besta í sumar og haust. Um er að ræða eitt þekktasta sjóbirtingssvæði landsins en þar renna í Skaftá bergvatnsárnar Fossálar, Geirlandsá (Breiðabakkakvísl) og Hörgsá, ásamt fleiri lækjum. Sagði Ragnar að vel á annað þúsund sjóbirtingar væru komnir á land frá því í apríl. Tveir veiðimenn sem veiddu nú síðast voru með 63 birtinga eftir einn og hálfan dag. Mikið hafi verið af óvanalega fallegum geldfiski í bland við hefðbundna stóra hrygningarfiska. 

Fram kom að Ragnar muni taka við umsjón með svokölluðum Mávabótaálum og Hólmasvæði frá með næsta vori, en það er talsvert fyrir neðan Vatnamótin og þar byrjar sjóbirtingur yfirleitt að veiðast fyrst eftir að hann gengur upp í Skaftá. Lítið hafi verið veitt þar í sumar en í sumar hefur verið unnið við að bæta aðstöðu og hafa menn skroppið í veiði á milli verka og yfirleitt gert ágæta veiði.

Þessu til viðbótar hafa borist almennt góðar fréttir af veiðisvæðum Stangveiðifélags Keflavíkur sem leigir þar nokkur svæði. 

• Blogga um frétt

Seinustu hundraðkallar sumarsins