Hús Magasin vettvangur jóladagatals DR

Danskir fjölmiðlar segja, að danska ríkissjónvarpið, DR, hafi gefið Magasin verslunarkeðjunni stóra jólagjöf en jóladagatal DR, sjónvarpsþættir fyrir börn í desember þar sem dagarnir fram til jóla eru taldir niður, gerast m.a í og undir stórverslun Magasin við Kongens Nytorv í Kaupmannahöfn og því sést hús eða vörumerki Magasin í öllum þáttunum 24.

Að sögn blaðsins Politiken fjallar jóladagatalið þetta árið um að hús Magasin sé byggt á sama stað og Absalon biskup byggði hús í upphafi byggðar í Kaupmannahöfn. Þættirnir heita Absalons Hemmelighed og fjalla um leit að leyndarmáli, sem Absalon á að hafa skilið eftir í húsi sínu. Talið er að um 900 þúsund manns fylgist daglega með sjónvarpsþáttunum.

Politiken segir að Magasin hafi ekki tekið þátt í gerð sjónvarpsþáttanna eða greitt DR fyrir. En haft er eftir Mikael Ostenfeld, sérfræðingi hjá birtingarhúsinu Carat, að þættirnir séu milljóna virði fyrir Magasin.

„Allar verslanir vilja tengjast jólunum og það á ekki síst við um Magasin, sem selur jólagjafir," segir hann. Ostenfeld áætlar, að hefði Magasin keypt auglýsingatíma hjá DR, sem svarar til þess tíma sem fjallað er um verslunina í þáttunum, hefði verðmiðinn verið 7-10 milljónir danskra króna, jafnvirði 90-125 milljóna íslenskra króna.

Maya Illsøe, höfundur þáttanna, segir að hún hafi talið mikilvægt að fá að nota hús Magasin í þáttunum því í raun hafi Absalon byggt hús á sama stað. Hún segir að yfirmenn DR hafi óttast að þættirnir yrðu einskonar óbein auglýsing fyrir Magasin en á endanum hafi þeir fallist á að húsið væri mikilvægt í sögunni.

Magasin er í eigu I-Holding, sem aftur er í eigu Baugs Group, B2B fjárfestingarfélags og fleiri íslenskra fjárfesta.

• 1 blogg um fréttina

Bloggað um fréttina

• Óttarr Makuch: Hús Magasin vettvangur jóladagatals DR