Orkuveitan setur allt að 2 milljarða í Reykjavík Energy Invest

Stjórn Orkuveitu Reykjavíkur hefur ákveðið að leggja allt að tveimur milljörðum króna til nýs útrásarfyrirtækis orkuþekkingar – Reykjavik Energy Invest. Auk nýs hlutafjár verða eignarhlutir Orkuveitu Reykjavíkur í Enex, Enex Kína og öðrum útrásarfyrirtækjum lagðir inn í nýja félagið. Reykjavik Energy Invest er alfarið í eigu Orkuveitunnar.

Guðlaugur Þór Þórðarson, stjórnarformaður Orkuveitu Reykjavíkur, segir í fréttatilkynningu markmiðið að viðhalda forystu fyrirtækisins í útflutningi þekkingar á umhverfisvænni nýtingu orkulinda, sérstaklega jarðhitans.

Guðlaugur Þór segir ennfremur í fréttatilkynningu að rétt þyki, þar sem útrásin verði sífellt umfangsmeiri, að hafa hana í sérstöku hlutafélagi þar sem ábyrgð er takmörkuð og eigendur Orkuveitunnar því ekki í beinni ábyrgð fyrir öllum útrásarverkefnum. Hann bendir einnig á að með hlutafélagsforminu sé hægt að taka samstarfsaðila beint inn í félagið.

Orkuveita Reykjavíkur á um fjórðungshlut í Enex og á þriðjung í Enex-Kína. Þá er Orkuveitan einnig þátttakandi í nokkrum verkefnum sem verið er að skoða erlendis.

Hlutafé verður greitt inn til félagsins á næstu misserum eftir því sem starfsemin og verkefni þróast.

• 1 blogg um fréttina

Bloggað um fréttina

• Magnús Helgi Björgvinsson: Gagnrýndu Sjálfstæðismenn ekki "Línunet" á sínum tíma