Útilokar ekki aðgerðir vegna stjórnunartengsla

Samkeppniseftirlitið segist ekki útiloka, að gripið verði til aðgerða síðar vegna stjórnunartengsla sem eru fyrir hendi í Byr sparisjóði við önnur fjármálafyrirtæki. Stofnunin gerir hins vegar ekki athugasemdir við samruna Sparisjóðs vélstjóra og Sparisjóðs Hafnarfjarðar undir nafni Byrs.

Í ákvörðun Samkeppniseftirlitsins segir, að aðilar tengdir FL-Group séu meðal hluthafa Byrs. Magnús Ármann, einn stjórnarmanna Byrs sé jafnframt stjórnarmaður í FL-Group ásamt því að vera hluthafi í félögunum. FL-Group og og tengdir aðilar ráði yfir töluverðum fjölda hlutabréfa í Glitni banka og sitji stjórnarformaður, forstjóri og aðstoðarforstjóri FL-Group í stjórn Glitnis. Jafnframt sitji framkvæmdastjóri MP fjárfestingarbanka, Styrmir Þór Bragason, í stjórn Byrs og sömuleiðis Jón Þorsteinn Jónsson, stjórnarmaður í bankanum.

Samkeppniseftirlitið segir, að starfsemi Byrs sparisjóðs skarist að verulegu leyti við starfsemi Glitnis. Þessi fyrirtæki séu þannig keppinautar m.a. í viðskiptabankaþjónustu. Minni skörun sé við starfsemi MP fjárfestingarbanka.

Samkeppniseftirlitið segist ekki hafa fengið tilkynningu um það að FL-Group og/eða félög tengd FL-Group hafi náð virkum yfirráðum yfir Glitni. Á þessu stigi sé því ekki ástæða til að ætla að umræddur samruni SPV og SPH feli einnig í sér samruna við Glitni. Aftur á móti sé það í verkahring Samkeppniseftirlitsins að kanna stjórnunar- og eignatengsl á milli fyrirtækja, m.a. með það í huga, að stjórnunar- og eignatengsl milli keppinauta á fákeppnismörkuðum geti haft mjög skaðleg áhrif á samkeppni og kallað á sérstakar aðgerðir yfirvalda. Því geti umrædd stjórnunartengsl, sem séu fyrir hendi í Byr sparisjóði við önnur fjármálafyrirtæki gert það að verkum að ástæða sé til þess að hefja rannsókn á samkeppnislegum áhrifum þeirra. Til slíkra álitaefna hefur Samkeppniseftirlitið þó ekki tekið afstöðu að svo stöddu.

Ákvörðun Samkeppniseftirlitsins

• 1 blogg um fréttina

Bloggað um fréttina

• Níels A. Ársælsson.: Stórfellt brot LÍÚ