Fyrsta Airbus A380 vélin afhent í dag

Flugvélaframleiðandinn Airbus mun afhenda Singapore Airlines fyrstu fullkláruðu A380 risavélina í dag, 18 mánuðum eftir áætlun. Smíði vélarinnar, sem ætlað er að taka 800 farþega, hefur tafist mikið og hefur kostnaður farið langt fram úr áætlun.

Til að varpa frekari skugga á málið hafa yfirmenn móðurfélags Airbus, EADS, verið sakaðir um innherjasvik.

Thomas Enders, framkvæmdastjóri EADS, segir að helsta áskorun fyrirtækisins verði enn það hvort Airbus nái að afhenda vélar á réttum tíma.

Enders og fleiri yfirmenn hafa verið undir smásjánni vegna þáttar þeirra í sölu á hlutabréfum í EADS áður en það var tilkynnt í júní í fyrra að A380 vélin myndi tefjast, en þær fréttir urðu til þess að hlutabréf í fyrirtækinu féllu í verði.

Franskir saksóknarar rannsaka nú málið en Enders, auk annarra hátt settra yfirmanna og eigenda hafa allir neitað sök.

• 1 blogg um fréttina

Bloggað um fréttina

• Sigurður Elvar Þórólfsson: Stykkishólmur?