Viðskipti | mbl | 14.2.2008 | 9:04

Óbreyttir stýrivextir

Seðlabanki Íslands Árvakur/Ómar

Bankastjórn Seðlabanka Íslands ákvað á fundi sínum að halda stýrivöxtum óbreyttum í 13,75%. Er þetta í samræmi við spá greiningardeilda. Bankastjórn mun kynna rök fyrir ákvörðun sinni á sérstökum fundi sem sjónvarpað verður á vef bankans klukkan 11.

Samkvæmt áður birtri áætlun verður næsta reglulega ákvörðun bankastjórnar Seðlabanka Íslands um stýrivexti birt fimmtudaginn 10. apríl 2008.

Seðlabanki Íslands hækkaði stýrivexti um 0,45% þann 1. nóvember sl. en á auka vaxtaákvörðunardegi þann 20. desember sl. ákvað bankastjórnin að halda vöxtum óbreyttum. Stýrivaxtahækkunin í nóvember var eina stýrivaxtahækkun Seðlabankans á síðasta ári en þeir höfðu verið óbreyttir frá því í lok árs 2006, 13,3%. Alls voru vextirnir hækkaðir sjö sinnum á árinu 2006 um samtals 3,3 prósentustig. Frá því í maí árið 2004 hafa vextirnir hins vegar verið hækkaðir nítján sinnum.