Hagnaður Össurar nam 3,5 milljónum Bandaríkjadala á öðrum ársfjórðungi. Á sama tímabili í fyrra nam hagnaður félagsins 3,9 milljónum dala. Á fyrstu sex mánuðum ársins var hagnaður Össurar 11,1 milljón Bandaríkjadala, samanborið við 10,6 milljónir á sama tímabili árið 2008.
Sala var 81,3 milljónir Bandaríkjadala á öðrum ársfjórðungi, dróst saman um 3% mælt í staðbundinni mynt, eða 12% í Bandaríkjadal. EBITDA var 17,0 milljónir Bandaríkjadala, dróst saman um 11% EBITDA hlutfall var 21%, sem er sama hlutfall og fyrir sama tímabil í fyrra, að því er segir í afkomutilkynningu.
Sala var 158,5 milljónir Bandaríkjadala á fyrstu sex mánuðum ársins, dróst saman um 3% mælt í staðbundinni mynt, eða 12% í dölum.
EBITDA var 29,8 milljónir Bandaríkjadala, dróst saman um 29% EBITDA hlutfall var 19%, samanborið við 23% á sama tímabili í fyrra
Jón Sigurðsson, forstjóri Össurar segir í tilkynningu: „Efnahagsþrengingar á öllum okkar helstu mörkuðum hafa haft áhrif á sölu og viðskiptavinir okkar fara varfærnislega vegna óvissu um ástandið. Samningar við suma birgja í Evrópu hafa ekki verið endurnýjaðir sem hefur tímabundið neikvæð áhrif á sölu í Evrópu en ekki arðsemi. Skýr stefna í sölu og markaðsmálum í Bandaríkjunum gefur von um jákvæða þróun.
Ný útgáfa af rafeindastýrða hnénu RHEO KNEE II sem og staðfesting á að rafeindastýrði fóturinn PROPRIO FOOT hahfi verið samþykktur inn í endurgreiðslukerfið í Bandaríkjunum eru mikilvægir áfangar fyrir framtíð bionic vörulínunnar."