Gert að greiða sekt fyrir peningaþvætti

Hollenski bankinn ABN AMRO, sem Royal Bank of Scotland yfirtók árið 2007, þarf að greiða 500 milljónir Bandaríkjadala, 63,3 milljarða króna, í sekt til bandarískra stjórnvalda fyrir að hafa aðstoðað banka og viðskiptavini þeirra, í ríkjum sem eru á svörtum lista, við peningaþvætti.

Ronald Machen, ráðuneytisstjóri í bandaríska dómsmálaráðuneytinu, segir að í meira en áratug hafi ABN AMRO bankinn aðstoðað ríki sem eru beitt refsiaðgerðum við peningaþvætti sem nemur hundruð milljónum dala og þannig brotið bandarísk lög. Meðal annars banka í Íran, Líbýu, Súdan og Kúbu. Öll eru ríkin beitt refsiaðgerðum af hálfu Bandaríkjanna. Kúba hefur til að mynda verið beitt viðskiptaþvingunum í tæpa hálfa öld.

Samkvæmt dómsskjölum fóru yfir 3,2 milljarðar dala um útibú ABN í New York frá alls konar skúffufyrirtækjum og erlendum fjármálastofnunum sem þykja vafasamar.

ABN AMRO samþykkti að greiða 500 milljónir dala í stjórnvaldssekt og losna þannig undan formlegri ákæru.

• 1 blogg um fréttina

Bloggað um fréttina

• Ómar Gíslason: Svona á að gera það!