Ráðinn útibússtjóri Landsbankans í Reykjanesbæ

Einar Hannesson, fyrrverandi sparisjóðsstjóri Spkef, hefur verið ráðinn útibússtjóri Landsbankans í Reykjanesbæ. Einar mun taka við nýrri stöðu nú þegar.

Fram kemur í tilkynningu frá Landsbankanum að umsækjendur um stöðuna hafi verið 15, þar af 5 starfsmenn Landsbankans og 10 utan bankans. Þrjár konur sóttu um starfið en 12 karlar.

Segir í tilkynningu að Einar hafi síðast starfað sem sparisjóðsstjóri SpKef, en hafi í kjölfar samrunans átt sæti í stýrihóp um sameiningu Landsbankans og SpKef.

Áður starfaði Einar sem forstöðumaður flugafgreiðslusviðs Icelandair Ground Service og staðgengill framkvæmdastjóra. Hann hefur lokið B.Sc. gráðu í iðnaðartæknifræði auk MBA náms frá Háskóla Íslands.

Í kjölfar samruna Landsbankans og SpKef er útibú Landsbankans í Reykjanesbæ eitt það fjölmennasta hjá Landsbankanum, en undir útibúið heyra afgreiðslur í Vogum, Sandgerði, Njarðvík, Garði og Leifsstöð. Alls starfa um 60 manns í útibúi og afgreiðslum.

Einar er kvæntur Magndísi Andrésdóttur, hjúkrunarfræðingi og eiga þau þrjú börn.

• 1 blogg um fréttina

Bloggað um fréttina

• Sigurður Haraldsson: Ekki hæfur!