Neysla kindakjöts aldrei minni

Neysla á kindakjöti hér á landi var að jafnaði 18,8 kíló á hvern íbúa árið 2011, en það er minnsta neysla frá því að Hagstofan hóf að safna slíkum gögnum árið 1983. Sama ár var neysla á kindakjöti 45,3 kíló á hvern íbúa. Árið 2007 varð neysla alifuglakjöts í fyrsta sinn meiri en neysla kindakjöts. Í fyrra var neysla á alifuglakjöti að meðaltali 24,2 kíló á hvern íbúa. 

Þetta er meðal þess sem kemur fram í Landshögum 2012, hagtöluárbók Hagstofunnar, sem kemur út í dag. Meðal annarra upplýsinga sem fram koma í ritinu er að 95% afplánunarfanga eru karlar og meðalævilengd íslenskra kvenna árið 2011 var 83,6 ár.

• Blogga um frétt