Uppgjör hjá Heklu: Friðbert selur sinn hlut

Friðbert Friðbertsson, helmingseigandi Heklu hf. mun selja hlut sinn í félaginu til nýrra meðeigenda, en fyrir á Franz Jezorski helming í fyrirtækinu. Samkvæmt heimildum mbl.is sendi Franz starfsmönnum Heklu tölvupóst í dag þar sem þetta var tilkynnt, en eigendurnir höfðu deilt um kaup á félaginu um nokkra hríð.

Var uppi samkomulag að ef Friðbert næði ekki að klára fjármögnun á kaupum á hlut Franz myndi hann ganga úr félaginu sem nú er orðin raunin. Samkvæmt tölvupóstinum verða nýir eigendur kynntir fljótlega, en kaupin eru að fullu fjármögnuð. 

Í lok árs 2010 var greint frá sölu Kaupþings á Heklu, en Franz og Friðbert tóku við félaginu í febrúar árið 2011. Þeir hafa áður átt viðskipti í Þýskalandi og unnu meðal annars að opnun Bauhaus á Íslandi og í Noregi. Franz hefur áður meðal annars unnið við fasteignasölu og lögmannsstörf. Friðbert starfaði hér áður meðal annars fyrir Húsasmiðjuna og Coca Cola.

• Blogga um frétt