Á fjárlögum þessa árs er gert ráð fyrir liðlega 10,3 milljörðum króna til fjárfestinga samkvæmt sérstakri fjárfestingaráætlun ríkisstjórnarinnar 2013 til 2015. Áætlunin tekur til framkvæmda sem ráðgert er að fjármagna með veiðileyfagjöldum og arðgreiðslum af eignahluta ríkisins í viðskiptabönkunum eða sölu á þeim eignahlutum. Þetta segir í tilkynningu frá ríkisstjórninni, en meðal fjárfestinga er 1 milljarður í uppbyggingu fangelsis, 800 milljónir í Hús íslenskra fræða og 500 milljónir í Náttúruminjasafn og rúmur milljarður í græna hagkerfið.
Markmið fjárfestingaáætlunar er að styðja við hagvöxt og fjölbreytni í atvinnulífi. Hún er liður í nýrri sókn eftir efnahagshrunið og er ætlað að auka fjölbreytni atvinnulífsins og styðja við efnahagsbata og hagvöxt.
Áætlað veiðigjald og leiga á aflaheimildum skilar 4,2 milljörðum króna til fjárfestingaráætlunarinnar á þessu ári. Þar af renna 2,5 milljarðar króna til samgönguframkvæmda, meðal annars Norðfjarðarganga. Þá verður framlag til rannsókna- og tækniþróunarsjóða aukið um 1,3 milljarða króna á árinu.
Nærri 6,2 milljarðar króna af arði ríkisins af eignarhlutum þess í viðskiptabönkunum og hugsanlegrar sölu á þeim eignarhlutum verður varið til nýframkvæmda eða viðhalds fasteigna, örvunar græna hagkerfisins, skapandi greina og uppbyggingar ferðaþjónustunnar.
Áætluð skipting er sem hér segir: