Fimmtán vilja eignast Ístak

Fimmtán óskuldbindandi tilboðum í verktakafyrirtækið Ístak var skilað inn til Landsbankans, þar af níu erlendum. Bankinn eignaðist fyrirtækið í september á síðasta ári þegar móðurfélag Ístaks, danski verktakarisinn E. Pihl & Son, gjaldþrota, en mikilli útþenslustefnu á síðustu árum var kennt um.

Þátttakendur í tilboðinu fengu afhent ítarleg sölugögn eftir að hafa sýnt fram á þriggja milljarða fjárfestingargetu og undirritað trúnaðaryfirlýsingu. Tilboð fjárfesta verða nú skoðuð og hluta þeirra boðið á síðara stig söluferlisins. Þetta kemur fram í tilkynningu frá Landsbankanum.

Ístak var með baktryggingu á um 70% verkefna sinna gegnum móðurfélagið og var því í vondri stöðu við gjaldþrotið. Eftir samningaviðræður við verkkaupendur varð þó úr að Ístak fékk að halda átta af þeim níu verkefnum sem það var með í Noregi og hefur það að auki samið um ný verkefni. 

• Blogga um frétt