Bjarni Benediktsson, fjármála- og efnahagsráðherra, segir að sú hugmynd að skipa starfshóp um mögulegar breytingar á lögum um Seðlabankann feli ekki í sér vantraust á seðlabankastjóra. Þetta kom fram í máli hans við fréttamenn eftir ríkisstjórnarfund í dag. Bjarni sagði að í engu verði kvikað frá sjálfstæði bankans. Þetta kom fram í hádegisfréttum RÚV.
Bjarni var spurður út í mögulega sameiningu Seðlabankans og Fjármálaeftirlitsins, en hann sagði að nú væri ekki rétti tímapunkturinn til að segja hver niðurstaða starfshópsins verði. Þá sagði hann að nú væri komið að lokum á skipunartíma seðlabankastjóra eftir að breytingar voru gerðar fyrir fimm árum. Því sé rétt að meta reynsluna af breytingunum og því fyrirkomulagi og sjá hvernig það kom út í samanburði við fyrra kerfi. Í dag er einn seðlabankastjóri og annar varaseðlabankastjóri. Áður voru þrír seðlabankastjórar og var einn þeirra formaður bankastjórnar.