Félag atvinnurekenda tekur undir hvatningu Alþýðusamband Íslands til neytenda um að fylgjast með verðbreytingum sem verða vegna skattabreytinga nú um áramótin. Þetta er meðal þess sem fram kemur í tilkynningu frá Ólafi Stephensen, framkvæmdastjóra félagsins.

Þar kemur fram að  tvær breytingar hafi farið fram á álagningu neysluskatta, annars vegar hafi verið „stigið skref í samræmingu skattþrepa virðisaukaskatts“ og hins vegar vörugjöld verið afnumin. Þá segir að félagið taki breytingunum fagnandi, en hvetur neytendur þó til að hafa tvennt í huga þegar verðbreytingar eru skoðaðar.

„Annars vegar hafa margir innflytjendur og seljendur heimilis- og raftækja þegar lækkað verð þeirra til samræmis við afnám vörugjaldanna. Þetta töldu mörg fyrirtæki sig verða að gera strax í september þegar frumvarp um afnám vörugjalda kom fram á Alþingi, einfaldlega til að tryggja sölu það sem eftir lifði árs. Ella hefðu verið líkur á að margir hefðu frestað kaupum á raftækjum fram yfir áramót. Þessi fyrirtæki hafa þannig tekið vörugjaldið á sig í nokkra mánuði og tryggt að neytendur nutu verðlækkunarinnar fyrr en ella, eins og sést glöggt í tölum Hagstofunnar,“ segir í tilkynningunni. 

„Hins vegar hefur FA bent á að ekki var fallizt á tillögur félagsins um að innflytjendur fengju endurgreitt vörugjald sem þeir hafa þegar greitt til ríkissjóðs af vörum sem þeir eiga óseldar á lager um áramót. Vegna þessa getur áhrifa vörugjalds gætt áfram í verði ýmissa vara nokkrar vikur fram á nýja árið og verðlækkunin til neytenda frestazt sem því nemur.“

Tengdar fréttir

Verðbreytingar um áramótin

Matvælaverð getur hækkað meira

• Fleiri á verði vegna verðbreytinga
• Verðhækkanir í Stúdentakjallaranum
• Kaffibollinn hækkaður í 620 krónur
• Bíómiðinn lækki um 5-15 krónur

» Fleiri tengdar fréttir

• Blogga um frétt