Samanlagður hagnaður Arion banka, Íslandsbanka og Landsbankans á fyrsta fjórðungi ársins jókst um 72% á milli ára. Alls nam hann 26,7 milljörðum króna borið saman við 15,5 milljarða króna á sama tíma í fyrra.
Þó ber að halda því til haga að hagnaður Arion banka, sem nam 14,9 milljörðum króna, einkenndist mjög af einskiptisliðum. Hagnaður bankans af reglulegri starfsemi nam fjórum milljörðum króna á þessum fyrstu þremur mánuðum ársins samanborið við 1,7 milljarða á sama tímabili í fyrra.
Hagnaður Íslandsbanka af reglulegri starfsemi var sá sami nú og fyrir ári, 4,4 milljarðar. Heildarhagnaður bankans dróst saman um tæpa þrjá milljarða, að því er fram kemur í umfjöllun um afkomu bankanna í ViðskiptaMogganum í dag.