Súpubíllinn Farmers Soup fékk loks stæði við Seðlabankann, á móti Hörpu, eftir að málinu hafði verið kastað á milli í borginni um nokkurn tíma.
Jónína Gunnarsdóttir, eigandi bílsins, segist mjög ánægð með niðurstöðuna. Hún bendir á að margir ferðamenn leggi leið sína þar framhjá á leið í Hörpu.
Hún opnaði bílinn aftur fyrir gesti og gangandi í fyrradag og segir undirtektirnar hafa verið góðar.
Þá hefur hún slegið um sig og býður nú einnig upp á fiskisúpu auk kjötsúpunnar.
Líkt og fram hefur komið var Súpubíllinn á Skólavörðuholti síðasta sumar. Þegar hún ætlaði að sækja aftur um stæði fyrir sumarið var henni hins vegar tjáð að bílinn mætti ekki vera þar. Staðurinn væri nú einungis ætlaður vögnum. Jónína sá fram á að þurfa að selja bílinn eftir að hafa varið miklum fjármunum í að standsetja hann fyrir sumarið.
„Ég er bara kona sem er að reyna að gera eitthvað skemmtilegt,“ sagði Jónína í samtali við mbl.is, þegar hún sá fram ekki fram á að geta verið með vagninn. Þá sagði hún að síðasta sumar hefði verið sérstaklega skemmtilegt. Mikið hafi verið um Íslendinga, sérstaklega einstæðinga sem komu og tóku matinn með sér heim og þá hafi súpan vakið mikla lukku hjá ferðamönnum.
Ákveðin stæði í borginni eru frátekin fyrir götusölu og er fólki heimilt að sækja um þau. Stæðið sem Jónína fékk var hins vegar ekki á meðal þeirra en hún segir að borgarstarfsmenn hefðu haft samband við hana eftir að fjallað var um málið í fjölmiðlum.
Metfjöldi sótti um að vera með söluvagn eða sölubíl í miðborg Reykjavíkur í sumar. Flestir sem voru með slíka starfsemi í fyrra endurnýjuðu leyfi sín og fjórir nýir sóttu um.