Hlutabréf Icelandair hækkuðu í dag í kjölfar þess að félagið uppfærði afkomuspána og greindi frá auknum hagnaði milli ára.
Í dag voru mestu viðskiptin með bréf Icelandair sem hækkuðu um 2,17 prósent. Heildarveltan með bréf félagsins nam 295,3 milljónum króna við lokun markaða klukkan fjögur í dag. Viðskiptin voru 28 í heildina.
Gengi bréfa Icelandair er nú í hæstu hæðum, eða 25,85 krónur á hlut. Gengið hefur ekki verið hærra síðan í febrúar 2008, eða í rúm sjö ár.
Í afkomutilkynningu sem Icelandair Group sendi frá sér í gærkvöldi kom fram að lækkun eldsneytisverðs á milli ára hefði m.a. haft jákvæð áhrif á afkomu félagsins á öðrum ársfjórðungi þar sem hagnaður félagsins fyrir afskriftir, fjármagnsliði og skatta (EBITDA) jókst um fimm milljónir dollara, eða sem jafngildir um 670 milljónum íslenskra króna, milli ára.
EBITDA á öðrum ársfjórðungi nam alls 50,3 milljónum dollara, eða sem jafngildir um 6,7 milljörðum íslenskra króna.