„N1 hefur afdráttarlausa stefnu í samkeppnismálum, sem og öðrum málum, um að starfsemi þess skuli ávallt markaður skýr rammi inna vébanda laga og reglna,“ segir í tilkynningu fyrirtækisins til Kauphallarinnar.
„Í dag féll dómur í Hæstarétti Íslands í olíusamráðsmálinu svokallaða sem hófst með húsrannsókn samkeppnisyfirvalda í lok árs 2001. N1 vill taka fram að félagið er ekki aðili að samráðsmálinu, enda tók það til starfa í ársbyrjun 2007,“ segir í tilkynningu frá N1.
Hæstiréttur sýknaði í gær Samkeppniseftirlitið og íslenska ríkið af kröfum Olíuverslunar Íslands, Skeljungs og Olíufélagið (nú Ker) sem fóru fram á ógildingu áfrýjunarnefndar samkeppnismála, sem úrskurðaði að félögin hefðu haft með sér ólögmætt verðsamráð með olíuvörur hér á landi.
Hefur úrskurður þar með verið endanlega staðfestur.
Er félögunum gert að greiða samtals 1,5 milljarð króna í sekt.
Frétt mbl.is: Staðfestir úrskurð um verðsamráð
N1 á rætur að rekja til Hins íslenska steinolíufélags, sem var stofnað árið 1913. Forveri N1, Olíufélagið hf., var stofnað þrjátíu og þremur árum síðar, árið 1946, og tók þá yfir rekstur Hins íslenska steinolíufélags.
Eigendur Bílanausts keyptu Olíufélagið árið 2006 og ári síðar sameinuðu þeir bæði félögin og nokkur hjólbarðaverkstæði undir merkjum N1. Um áramótin 2012/2013 varð Bílanaust sjálfstætt fyrirtæki.
Í lok síðasta árs kom út markaðsrannsókn frá Samkeppniseftirlitinu um olíumarkaðinn.
Í niðurstöðum rannsóknarinnar sagði að samkeppni væri verulega skert á mikilvægum hluta markaðarins og að þörf væri á aðgerðum til að bæta hag almennings.
Talið er að neytendur hafi greitt 4 til 4,5 milljörðum króna of mikið fyrir bifreiðaeldsneyti í smásölu árið 2014.