„Ég hef aldrei séð þetta, er stelpa að vinna í þessu?,“ er dæmi um athugasemdir sem Svanhildur Gísladóttir, stálsmiður, hefur fengið í gegnum tíðina sem betur fer séu þau þó sjaldgæf og henni finnist það jafnvel lúmskt gaman að heyra þau líka.
Rætt er við Svanhildi í Fagfólki vikunnar en hún segir að starfið sé ekki erfiðara en að prjóna peysu og vill sjá fleiri stelpur læra iðnina. Mikið vanti upp á greinar af þessu tagi séu kynntar fyrir stelpum og það hafi ekki verið fyrr en hún var komin af stað í öðru námi sem hún fann áhugann á stál- og rennismíðinni sem hún starfar við hjá Járnsmiðju Óðins.
Áhugamál Svanhildar er ljósmyndun og hefur hún tekið mikið af fallegum myndum á æskuslóðunum vestur á Barðaströnd. Þá er mikið að gera hjá henni í desember þegar vinir og vandamenn fá hana til að mynda fyrir jólakortin.
Fagfólkið er samstarfsverkefni Samtaka iðnaðarins og mbl.is.