Fjármálaútrás hafin á ný

Breska fjármálaeftirlitið veitti GAMMA Capital Management Limited sjálfstætt starfsleyfi til að veita fjármálaþjónustu í Bretlandi síðastliðinn föstudag.

„Með þessu skrefi verður GAMMA í enn betri stöðu en áður til að veita viðskiptavinum sínum öfluga þjónustu á alþjóðlegum vettvangi, meðal annars þegar kemur að erlendum verkefnum, fjárfestingum, fjármögnun og greiningavinnu,“ segir Gísli Hauksson, forstjóri fyrirtækisins. Með leyfinu verður GAMMA fyrsta íslenska fjármálafyrirtækið sem hefur starfsemi í London með leyfi breskra yfirvalda eftir hrunið 2008. Áður hafði GAMMA sinnt starfsemi í London í rúmt ár á grundvelli íslensks starfsleyfis, en GAMMA varð á síðasta ári fyrsta íslenska fjármálafyrirtækið til þess að hefja starfsemi í London í kjölfar tilkynningar um fyrirhugað afnám hafta.

Einnig rekur GAMMA fjárfestingarsjóðinn Total Return Fund, sem hefur heimildir til að fjárfesta erlendis. „Þær heimildir verða nýttar þegar gjaldeyrishöftum verður aflétt,“ segir Gísli.