Ríkisstjórn Spánar ætlar að leggja fram lagabreytingafrumvarp sem auðveldar fyrirtækjum að flytja höfuðstöðvar sínar frá Katalóníu.
90% af þeim 2,26 milljónum Katalóna sem kusu um sjálfstæði sjálfstjórnarhéraðsins í dag sögðu já en mikil átök voru milli kjósenda og lögreglu á kosningadag um síðustu mánaðarmót. Stjórnlagadómstóll Spánar frestaði í gær fyrirhuguðum þingfundi katalónska þingsins sem halda átti á mánudag til að reyna að hindra að héraðið geti lýst yfir sjálfstæði
Sabadell-bankinn tilkynnti í gær um flutning höfuðstöðva frá Katalóníu en hlutabréf í bankanum höfðu lækkað um 10% í verði í kjölfar kosninganna. Þá munu stjórnendur CaixaBanka, þriðja stærsta banka Spánar, hittast í dag til þess að ræða framhaldið.
Ástæðan sem Sabadell-bankinn gaf var sú að hann vildi vera með reksturinn skráðan í umdæmi Evrópusambandsins sem hefur gefið út að það viðurkenni ekki sjálfstæði Katalóníu.
Efnahagsumsvif í Katalóníu nema fimmtungi af spænska hagkerfinu en þar eru verksmiðjur stórfyrirtækja á borð við Volkswagen og Nestle. Nánar er greint frá málinu á fréttavef breska ríkisútvarpsins BBC.