Útlit er fyrir að verðbólga verði áfram við 2,5% verðbólgumarkmið Seðlabankans næstu mánuðina samkvæmt greiningu Íslandsbanka.
Vísitala neysluverðs lækkaði um 0,09% milli mánaða í janúar og hækkaði ársverðbólga í 2,4% úr 1,9% í desember. 12 mánaða verðbólga hefur ekki mælst jafn mikil á Íslandi síðan í maí 2014 eða í 44 mánuði.
Greining bankans spáir 0,7% hækkun í febrúar nk., 0,4% hækkun í mars og 0,3% hækkun vísitölu neysluverðs í apríl. Verðbólga mun samkvæmt því mælast 2,5% í apríl næstkomandi.
Húsnæðisliðurinn er sagður líklegur til að ráða miklu um þróun verðbólgu til skemmri tíma litið.
„Ef íbúðaverð hækkar lítið eða ekki á komandi mánuðum mun það skila minni verðbólgu en við gerum ráð fyrir. Á hinn bóginn er enn talsverður kostnaðarþrýstingur til staðar hjá innlendum framleiðendum, í smásöluverslun og í þjónustu.“
Þá er bent á að eldsneytisverð erlendis hafi hækkað talsvert síðustu mánuði og ekki sé útséð um hversu mikil heildaráhrif af þeirri hækkun verði hér á landi.
„Samspil þessara liða ræður að okkar mati hvað mestu um hvort við náum að sigla inn í fimmta ár verðbólgu undir markmiði á komandi mánuðum, eða hvort nú sér fyrir endann á því tímabili.“