Gísli Freyr Valdórsson
„Það er bara stór hluti af því að vera á vinnumarkaði að það getur komið að þeim tíma að manni sé sagt upp,“ segir Andrés Jónsson, stjórnendaráðgjafi og sérfræðingur í stjórnendaleit, í Dagmálum.
Hann segir að það eigi ekki að vera neinn áfellisdómur en að fólki finnist þó eins og það þurfi alltaf að vera að hreyfast fram á við.
„En er það raunhæft? Ég held ekki. Mjög góðu fólki hefur verið sagt upp og átt góðan feril eftir það.“
Ferillinn þurfi ekki alltaf að vera bein leið upp á við. „Er kannski eðlilegt að maður taki kannski góð sex til átta ár í stórri stjórnunarstöðu og svo bara sé kominn tími á nýtt fólk, sem komi með eitthvað nýtt að borðinu?,“ spyr Andrés og bendir á að maður gæti þá færst yfir í annars konar verkefni þar sem reynsla manns nýtist og maður getur um leið þroskað aðra hæfni.