Uppfærð afkomuspá Icelandair gerir ráð fyrir 220 milljarða króna tekjum á þessu ári og að hagnaður komi til með aukast frá því í fyrra. Þá er bókunarstaðan fyrir sumarið góð.
„Bókunarstaðan fyrir sumarið er ágæt, líkt og kemur fram í afkomuspánni er fjallað um markaðinn yfir hafið á milli Norður-Ameríku og Evrópu í gegnum Ísland. Markaðurinn frá Íslandi er mjög sterkur en ferðamannamarkaðurinn til Íslands er hægari en í fyrra, þar sem það er ekki eins mikil eftirspurn,“ segir Bogi Nils Bogason forstjóri Icelandair í samtali við ViðskiptaMoggann.
Hann segir að minni eftirspurn sé eftir ferðum til landsins en það megi rekja að einhverju leyti til samkeppnishæfni landsins og jarðhræringanna á Reykjanesi. Spurður nánar um samkeppnishæfnina segir hann að Ísland keppi við lönd eins og til að mynda Finnland sem er mun ódýrari kostur fyrir ferðamenn að heimsækja.
Að hans sögn er félagið í það sterkri stöðu að það geti fært áherslurnar á milli markaða eftir því hvernig eftirspurnin þróast.
„Núna erum við að sjá sterkt bókunarflæði á markaðnum yfir hafið í gegnum Ísland og við höfum verið að setja meiri fókus þar. Bókunarstaðan á þeim markaði er betri en í fyrra og þess vegna er farþegaskiptingin aðeins öðruvísi á milli ára. Hlutfall farþega sem eru að fljúga yfir hafið í gegnum Ísland verður hærra en á síðasta ári, á meðan hlutfall farþega sem koma til Íslands mun væntanlega minnka,“ segir Bogi Nils.
Hann kveðst vera bjartsýnn á að árið verði gott hjá Icelandair, en alltaf sé hægt að gera betur.
„Árið 2023 var það síðasta í enduruppbyggingunni eftir covid-19. Við höldum áfram að styrkja reksturinn og það var mjög mikilvægt að félagið skilaði hagnaði í fyrra í fyrsta skipti í mörg ár og við gerum ráð fyrir meiri hagnaði á þessu ári,“ segir Bogi Nils að lokum.