„Frá síðasta hausti höfum við fundið fyrir töluverðri aukningu í fyrirspurnum og verkefnum hefur fjölgað jafnt og þétt,“ segir Þórður Ágúst Hlynsson, sem nýlega tók við sem framkvæmdastjóri fyrirtækjaráðgjafar Fossa fjárfestingarbanka, spurður um stöðuna á mörkuðum þessa dagana. Eins og áður hefur verið fjallað um hefur velta á hlutabréfamarkaði dregist nokkuð saman á undanförnum mánuðum og markaðsvirði skráðra fyrirtækja lækkað nokkuð. Þá ríkir ákveðin óvissa um fyrirhugaðar nýskráningar á markað, en þó hafa farið fram hlutafjáraukningar – nú síðast hjá flugfélaginu Play.
Þórður segir að fyrirtækjaráðgjöf Fossa hafi þó á undanförnum misserum ráðið til sín starfsfólk sem hafi reynslu af kaup- og söluferli fyrirtækja, hlutafjárútboðum og nýskráningum fyrirtækja á markað. Hann segir verkefnastöðuna góða og mörg áhugaverð verkefni fram undan, því liggi fyrir að fjölga þurfi starfsfólki. Spurður nánar um stöðuna segir Þórður að vissulega hafi háir vextir haft sitt að segja um þróun fjármálamarkaða og verkefna, en til lengri tíma horfi það þó öðruvísi við og fleiri hafi gefið það út að þeir hugi að fjárfestingum og skráningu á markað.
Lestu meira um málið í ViðskiptaMogganum í dag.