Engar forsendur eru fyrir því að loka Ísafjarðardjúpi fyrir fiskeldi. Þetta segir Gunnar Bragi Sveinsson, alþingismaður og oddviti Framsóknarflokksins í Norðvesturkjördæmi, í aðsendri grein á fréttavefnum Bæjarins besta.

Segir hann að mikilvægt sé að Hafrannsóknastofnun fái ráðrúm til að klára sína rannsóknar- og þróunarvinnu. Í dag sé hins vegar ekki hægt að leggja þær rannsóknir til grundvallar ákvarðanatöku um framtíð fiskeldis.

„Sé horft til þess, mögulegra mótvægisaðgerða og hinna jákvæðu samfélagsáhrifa eru engar forsendur fyrir því að loka Djúpinu,“ skrifar Gunnar Bragi.

Vísar hann þar til áhættumats vegna mögulegrar erfðablönd­un­ar frá lax­eldi í sjókví­um á Vest­fjörðum og Aust­fjörðum, sem Haf­rann­sókna­stofn­un gaf út í júlímánuði, en í skýrslu stofnunarinnar er lagt til að eldi í Ísafjarðardjúpi verði ekki leyft vegna mögulegra mikilla neikvæðra áhrifa á laxastofna í Djúpinu.

Gunnar Bragi Sveinsson, þingmaður Framsóknarflokksins. mbl.is/Eggert

Vestfirðingum fækkað um 25% á 30 árum

„Við erum í þeirri forréttindastöðu að vera að byggja eldi hér upp nánast frá grunni, þannig getum við lært af mistökum okkar og annarra eldisþjóða og tryggt að gera þetta rétt og vel. Vestfirðingum hefur fækkað um 25% á síðustu 30 árum og þeir eru ekki að biðja um álver eða stóriðju, þeir eru að biðja um sanngirni ríkisvaldsins, að það leggist ekki í veg fyrir umhverfisvæna matvælaframleiðslu með boðum og bönnum heldur finni lausnir á þeim vandamálum sem fylgt geta slíkri starfsemi. Fyrir því mun ég berjast inní umhverfisnefnd þingsins og á þinginu sjálfu,“ skrifar þingmaðurinn og fyrrverandi sjávarútvegsráðherrann.

For­stjóri Haf­rann­sókn­a­stofn­un­ar hefur þegar sagt í samtali við 200 mílur að við gerð áhættumatsins hafi áhætt­an af erfðablönd­un verið skoðuð en ekki ávinn­ing­ur ná­lægra byggðalaga vegna at­vinnu­upp­bygg­ing­ar lax­eld­is.

„Þetta bygg­ir á bestu fá­an­legu þekk­ingu en við ger­um okk­ur grein fyr­ir því að við vit­um ekki hvernig þetta verður í raun og veru,“ sagði Sig­urður Guðjóns­son, for­stjóri Hafró.

Tengdar fréttir

Fiskeldi

Mikill útflutningur frá Vestfjörðum

• Akureyringar taka ekki afstöðu
• Lagareldisfrumvarpið ekki lagt fram
• Þróa aðferð til framleiðslu á geldlaxi
• Stórfellt laxeldi áformað

» Fleiri tengdar fréttir

• Blogga um frétt