Er Britney ólétt í þriðja sinn?

Í slúðurmiðlum heimsins hafa verið uppi vangaveltur um hvort Britney Spears sé ólétt enn eina ferðina. Sögurnar fóru af stað eftir að Isaac Cohen, nýr kærasti poppsöngkonunnar, sást með eitthvað brúnt og slepjulegt á fingrinum þar sem hann sat við hliðina á kærustu sinni. Var tilgáta slúðurpressunnar sú að Britney þjáðist af morgunógleði og að hið brúna væri æla.

En nú hefur talsmaður Britney blásið á slíkar gróusögur og sagt þær fáránlegar. Hann segir Isaac hafa verið með hnetusmjör á fingrinum og einungis vegna þess að hann hafði ekki lyst á að sleikja það af hafi menn hleypt ímyndunaraflinu ótæpilega af stað.

Já, ekki er öll vitleysan eins.