Hafa séð Dylan 500 sinnum

„Þarna eru menn sem hafa séð allt upp í 500 tónleika með karlinum,“ segir Hilmar Thors, framkvæmdastjóri og eldheitur aðdáandi Bobs Dylans, um afar sérstakan hóp aðdáenda hins bandaríska tónlistarmanns. Hópur þessi, sem telur um 20 manns, er væntanlegur hingað til lands til þess að vera viðstaddur tónleika kappans í Egilshöll hinn 26. maí.

„Ég er hálfgerður viðvaningur innan um þessa menn. Ég komst inn í þennan hóp fyrir algjöra tilviljun,“ útskýrir Hilmar sem hefur „aðeins“ farið á um 30 tónleika með Dylan. Sú tala verður þó að teljast ansi athyglisverð í ljósi þess að Hilmar fór á fyrstu tónleikana árið 2003.