Vilhjálmur Bretaprins og eiginkona hans, Katrín hertogaynja af Cambridge, höfðuðu í dag mál gegn franska tímaritinu Closer fyrir að hafa brotið gegn friðhelgi einkalífs þeirra með því að birta myndir af Katrínu berbrjósta.
Á myndunum, sem eru víst nokkuð óskýrar, enda teknar með aðdráttarlinsu, má sjá Katrínu íklædda bikiníbuxum einum fata og Vilhjálmur sést nudda sólaráburði á bak hennar. Talsmenn hjónanna segja þau vera miður sín vegna myndbirtingarinnar og þetta atvik hafi vakið sárar minningar hjá prinsinum um það hvernig fjölmiðlar eltu móður hans, Díönu prinsessu heitna, á röndum.
Ritstjóri Closer, Laurence Pieau, ver myndbirtinguna og segir myndirnar síður en svo hneykslanlegar. Hún segist ætla að selja þær öðrum fjölmiðlum.
Samkvæmt frönskum lögum varðar myndbirtingin að öllum líkindum við lög um friðhelgi einkalífsins, en ólíklegt er talið að aðstandendur tímaritsins verði dæmdir til harðari refsingar en sektargreiðslu. Lögum samkvæmt væri hægt að dæma útgefanda eða ritstjóra tímaritsins til árs fangelsisvistar, en engin fordæmi eru fyrir svo þungum refsingum við brotum af þessu tagi.