Þurfti að greina frá fyrr en hún vildi
Setja bókamerki
„Mér finnst hún vera rosalega hugrökk. Það er ekkert grín að segja frá svona persónulegu við allan heiminn, sérstaklega þegar umræðan er búin að vera eins og hún er búin að vera,“ segir Guðný Ósk Laxdal, sérfræðingur í bresku konungsfjölskyldunni, í samtali við mbl.is um myndskeið Katrínar prinsessu af Wales þar sem hún greindi frá krabbameinsgreiningu sinni.
Miklar samsæriskenningar fóru á kreik á samfélagsmiðlum eftir að ekki hafði sést opinberlega til Katrínar síðan um jólin. Guðný ræddi málið ásamt Oddi Þórðarsyni, fréttamanni á Rúv, í Dagmálum á miðvikudag.
Myndskeið prinsessunnar birtist síðan á föstudag.
Guðný segist hafa grunað að um alvarleg veikindi var að ræða í ljósi lengdar veikindaleyfisins, en prinsessan fór í aðgerð á kviðarholi 16. janúar. Konungshöllin greindi þá frá því að hún myndi ekki sinna opinberum skyldum sínum fyrr en eftir páska.
„En mér datt aldrei í hug að það var þetta,“ segir hún.
Fjölmiðlar í naflaskoðun
Guðný segir að krabbameinsgreiningin hafi þaggað mikið niður í samsæriskenningunum.
Þá segir hún umræðuna um fjölmiðla í Bretlandi og Bandaríkjunum bera þess vott að tími sé kominn á ákveðna naflaskoðun hvað varðar umræðu síðustu vikna.
Spurð hvort að umfjöllunin minni að ákveðnu leyti á fárið í kringum Harry Bretaprins og Meghan Markle segir Guðný að Katrín fái mun jákvæðari umfjöllun.
Tímasetningin ekki tilviljun
Guðný nefnir að ákveðin leynd hvíli yfir Katrínu og almenningur sé mjög forvitin um hana.
„Bæði hún og Vilhjálmur passa mjög mikið upp á sína persónuvernd,“ segir hún og bætir við að þau setji börnin algerlega í fyrsta sæti.
Í myndskeiðinu greindi Katrín frá því að þau hjónin vönduðu sig mjög við að segja börnum sínum, Georg, Karlottu og Lúðvík, frá greiningunni til þess að fullvissa börnin um að það yrði í lagi með Katrínu.
Guðný nefnir að birting myndskeiðsins hafi líklega verið tímasett með börnin í huga, en myndskeiðið var birt klukkan 18 á föstudeginum fyrir að páskafrí barnanna hófst.
„Þau eru farin núna í sveitina, örugglega bara til að vernda krakkana fyrir allri umfjöllun og umtali í skólanum.“
„Gerði þetta eins og hún vildi“
Spurð hvort að fjölskyldunni hafi verið stillt upp við vegg og þurft að greina frá greiningunni opinberlega segir Guðný svo líklega vera.
„Já, ég er hrædd um það. Ég held að hún hafi sagt frá þessu fyrr en hún vildi, en ég held að hún hafi gert það samt á sýnum forsendum og gerði þetta eins og hún vildi gera það.“
Guðný telur að ef pressan hefði ekki verið orðin svona mikil hefði Katrín greint frá veikindunum í komandi viku, en líkt og áður sagði var búið að gefa það út að Katrín yrði frá störfum þar til eftir páska.
„Hún hefði alltaf greint frá þessu fyrr, frekar en síðar.“
Vilhjálmur gengið í gegnum margt
Katrín er einungis 42 ára gömul og því má áætla að greiningin hafi verið enn meira áfall sökum ungs aldurs.
„Ég held að það sé alveg nógu erfitt að greinast með krabbamein sem móðir þriggja barna 42 ára, og svo að hafa allan heiminn fylgjast með,“ segir Guðný og bætir þó við að prinsessan hafi verið í sviðsljósinu í nærri 20 ár og sé því ýmsu vön.
Þá er vert að nefna að Karl konungur greindist einnig með krabbamein í janúar.
Guðný segir að það hafi ekki komið henni á óvart að almenningur hafi fengið að vita meira um veikindi Karls. Hún ítrekar að Katrínu og Vilhjálmi sé mjög svo umhugað um að halda sínu einkalífi fjarri augum almennings.
Guðný bendir á í þessu samhengi öll áföllin sem Vilhjálmur hefur gengið í genum, svo sem skilnað foreldra sinna og umfjöllun um hann, dauða móður hans, stirt samband við Harry bróður hans, krabbameinsgreiningu föður hans og nú greiningu eiginkonunnar.
„Það getur ekki verið auðvelt.“
Enginn einn í veikindunum
Guðný bendir á að lokum að konungsfjölskyldan verði ábyggilega dugleg að vekja athygli á alls konar stofnunum og góðgerðarsamtökum fyrir krabbameinssjúka og aðstandendur þeirra í ljósi veikindanna.
„Þau segja að það sé enginn einn í þessu, sem er í raun mjög fallegt og sýnir líka hvernig þau hugsa. Þau eru persónulegir einstaklingar en eru alltaf með þetta opinbera skyldustarf í huga.“
Guðný heldur úti reikningi á Instagram þar sem hún fjallar um allt sem tengist konungsfjölskyldum, Royal Icelander.
Hvorki sést áður hér á landi né annars staðar
Mál hjúkrunarfræðingsins fer aftur fyrir héraðsdóm
Skaut sex sinnum að feðginum á aðfangadagskvöld
Bergnuminn í Hvalfirði
Gígbarmurinn hækkað frá því í gær
Forsetinn líti yfir axlirnar á þingheimi
Vonast til að tjaldbúðir við HÍ standi áfram
„Höfum ekki náð að skríða upp úr þeirri gryfju“