Ráðleggur hvernig efna megi nýársheitin

Konur og karlar eiga að fara ólíkt að þegar þau strengja nýársheit. Karlarnir eiga að setja sjálfum sér skýr markmið, ekki bara að léttast heldur um fyrirfram ákveðinn kílóafjölda, svo dæmi sé tekið. Konurnar eiga aftur á móti að segja vinum sínum og fjölskyldum frá heitunum eigi þeim að auðnast að fylgja þeim eftir. Þá skiptir hvatning ástvina konur töluverðu máli.

Þetta er mat Richards Wisemans, prófessors við háskólann í Hertfordskíri, sem rannsakaði nýársheit 3.000 manna. Samkvæmt Wiseman voru karlar 22% líklegri, konur 10%, til að efna heitin ef ofangreint átti við.