Veröld/Fólk | Veraldarfréttir | AP | 19.3.2008 | 8:00

Ólánið eltir óperuna

Lehman og Baird sem Tristan og Ísold á sviðinu í Metropolitan á föstudagskvöldið eftir að Voigt fékk kveisu og varð að hætta. AP

Hvert ólánið á fætur öðru hefur dunið yfir uppfærslu Metropolitan-óperunnar í New York á Tristan og Ísold, eftir Richard Wagner, og á sýningu í gærkvöldi losnaði hluti leikmyndar með þeim afleiðingum að tenórinn datt ofan í hvíslarastúkuna.

Frumsýnt var 10. mars, en ein helsta stjarnan í uppfærslunni, tenórinn Ben Heppner, veiktist og afboðaði sig í fyrstu fjórar sýningarnar. Alls eiga sýningarnar að verða sex. Staðgengill Heppners á frumsýningunni, John Mac Master, fékk afleita dóma.

Gary Lehman tók við af honum á föstudaginn, en þá, í öðrum þætti, fékk sópraninn, Deborah Voigt, svo heiftarlega magakveisu að gera varð hlé á sýningunni til að staðgengill hennar, Janice Baird, gæti tekið við, og þreytt frumraun sína á sviðinu í Metropolitan.

Í gærkvöldi, í þriðja þætti, losnaði hluti leikmyndarinnar með þeim afleiðingum, sem fyrr segir, að Lehman datt ofan í hvíslarastúkuna. Enn var gert hlé á sýningunni, að þessu sinni á meðan læknir leit á Lehman, sem fékk svo að halda áfram.

Fyrirhuguð síðdegissýning á óperunni á laugardaginn hefur ekki verið auglýst, en sýningum Metropolitan síðdegis á laugardögum er jafnan útvarpað um heim allan.

Heppner vonast til að geta tekið þátt í síðustu tveim sýningunum, 25. og 28. mars.