Hundakofi fyrir milljónir króna

Hundaunnandi í Kaliforníu í Bandaríkjunum hefur varið rúmum 2,5 milljónum króna til að byggja svo glæsilegan hundakofa í garðinum að vart er hægt að tala um kofa í því sambandi.

Er byggingin smærri útgáfa af heimili Tammy Kassis, eiganda hundanna, og hefur hundurinn sinn eigin garð og hvíta girðingu utan um hann. Þá er loftkælikerfi í kofanum auk gluggatjalda og veggfóðurs.

Hundarnir þrír, Darla, Chelsea og Coco Puff, hafa allir sín eigin rúm í kofanum og þar er einnig sjónvarp sem þeir geta notið á rigningardögum. Móðir Tammy tekur þátt í þessu, en hún kaupir á hundana föt og lítur á þá sem barnabörn sín. bjarni@mbl.is