Sinn er siður í landi hverju og í austurhluta Asíu virðist það ekki vera tiltökumál þótt þingmenn takist ekki á með orðum heldur örmum.
Átök brutust út í þingi Taívans í dag vegna umdeilds samnings um efnahagssamvinnu við Kína. Tveir þingmenn þurftu að leita sér læknishjálpar eftir að tveir tugir þingmanna, sem eru andvígir samningnum, reyndu að koma í veg fyrir að atkvæði yrðu greidd um hann.
Samkvæmt samningnum verða innflutningstollar á um 800 vörutegundum frá Kína lækkaðir. Andstæðingar samningsins óttast, að þetta muni skaða lítil fyrirtæki á Taívan vegna þess að ódýrar kínverskar vörur flæði inn á markaðinn.