Bresk kona hefur fengið demantshring sinn aftur í hendurnar eftir að hafa fyrir slysni sturtað honum niður í klósettið fyrir tveimur árum. Réð hún pípulagnafyrirtæki í að leita hringsins í skolpinu og tókst loks að finna hann.
Greint er frá þessu á vef Daily Telegraph. Þar kemur fram að fyrirtækið hafi meðal annars komið myndavél fyrir í skolptankinum án árangurs. Reynt var að sía 12 þúsund tonn af skolpi og jafnvel maður sendur inn í tankinn til þess að leita hringsins verðmæta með aðstoð málmleitartækis.
En fyrir einskæra tilviljum fannst hringurinn nýverið þegar sama fyrirtæki, og hafði leitað hringsins ákaft fyrir rúmum tveimur árum fann hringinn í skolpi. Að vísu vantaði tvo litla demanta á hringinn eftir að hafa velkst um í skít í rúm tvö ár en konan er alsæl enda hafði hún fengið hringinn að gjöf frá eiginmanninum.