Gríska lögreglan boðar til mótmæla á úrslitakvöldi Meistaradeildar Evrópu

Gríska lögreglan tók þá ákvörðun í dag að boða til mótmæla þann 23. maí nk., en þann sama dag verður leika knattspyrnufélögin AC Milan og Liverpool til úrslita í Aþenu í Meistaradeild Evrópu. Lögreglan hyggst með þessu þrýsta á ríkisstjórn landsins að hækka laun lögreglumanna og bæta önnur kjör þeirra.

Talsmaður stéttarfélags lögreglumanna sagði hinsvegar að mótmælin muni ekki trufla þær öryggisáætlanir sem eru í gangi fyrir leikinn stóra, en um 15.000 lögreglumenn munu verða á vakt í Aþenu. Því munu aðeins þeir lögreglumenn sem eru ekki á vakt taka þátt í mótmælunum.

Lögreglumennirnir krefjast, auk hærri launa, bættra starfsréttinda segir Christos Fotopoulos, varaformaður stéttarfélags lögreglumanna.

Úrslitaleikurinn í Meistaradeild Evrópu fer fram á Ólympíuleikvanginum í Aþenu á miðvikudag eftir viku og er búist við því að um 50.000 áhangendur liðanna munu koma til borgarinnar til að styðja sitt lið til sigurs.

• 1 blogg um fréttina

Bloggað um fréttina

• Reynir Jóhannesson: Spurning: hversu margir lögreglumenn starfa í Aþenu?