Flensufaraldur vekur ugg

Heilbrigðisyfirvöld í Hong Kong reyndu að draga úr ótta almennings vegna flensufaraldurs sem brotist hefur út í borginni og dregið fjögur börn til dauða. Í kjölfar flensunnar var gefin út tilskipun í gær um að öllum leik- og forskólum borgarinnar skyldi lokað.

Flensunnar hefur gætt í rúmlega tuttugu leik- og forskólum í borginni. „Þetta var erfið ákvörðun en við höfum áttað okkur á því að fjöldi tilfella er að aukast," sagði heilbrigðisráðherrann York Chow á blaðamannafundi í morgun.
Hann sagði að þessar aðgerðir væru kannski fremur harkalegar en vonaðist til að þær myndu róa foreldra sem hefðu áhyggjur af heilsu barna sinna.

Tilkynningin um lokunina kom seint í gær og því mættu margir foreldrar með börn sín í eftirdragi á leikskólana í morgun.

Flensufaraldurinn er skæður og hefur kallað fram minningar um SARS sem er skæður öndunarfærasjúkdómur sem herjaði á Hong Kong fyrir fimm árum en þá létust nærri 300 manns.

Börnin sem hafa látist undanfarið greindust með Inflúensu A eða H1N1 vírus sem hefur greinst í 184 sjúklingum en Chow sagði að ekkert benti til þess að þessi veira væri skæðari en aðrar flensur sem geisa með reglulegu millibili.

• 1 blogg um fréttina

Bloggað um fréttina

• Villi Asgeirsson: Ég passa í dag og á morgun...