Tsvangirai sakaður um landráð

Patrick Chinamasa, dómsmálaráðherra Zimbabve hefur sakað Morgan Tsvangirai, forsetaframbjóðanda stjórnarandstöðunnar í landinu um landráð og sagt hann vinna að því í samráði við Breta að Þvinga fram stjórnarskipti í landinu. Kosningar fóru fram í Zimbabve í lok mars og hafa niðurstöður í forsetakjöri enn ekki verið gerðar opinberar. Þetta kemur fram á fréttavef BBC. 

Chinamasa staðhæfir í viðtali við ríkisblaðið Herald að Tsvangirai hafi átt viðræður við fulltrúa breskra yfirvalda um hernaðarlega íhlutun láti Robert Mugabe ekki af völdum í Zimbabve.  

Stjórnarandstaðan náði meirihluta á þingi landsins samkvæmt þeim kosningaúrslitum sem birt hafa verið. Þá benda úrslit sem birt voru við kjörstaði til þess að Tsvangirai hafi hlotið fleiri atkvæði en Mugabe, sem setið hefur á forsetastóli í landinu frá árinu 1980.

Yfirvöld segja hins vegar að tölur úr talningum stemmi ekki og neita að birta úrslitin fyrr en að lokinni endurtalningu sem fram á að fara um næstu helgi. Tsvangirai hefur áður verið ákærður fyrir landráð en sýknaður fyrir dómi.

• 2 blogg um fréttina

Bloggað um fréttina

• Aðalsteinn Baldursson: Koma þessi viðbrögð á óvart?
• G. Tómas Gunnarsson: Hvernig kaupin gerast í Zimbabve