Sea Shepherd í átökum við hvalveiðimenn

Tveir félagar í samtökunum Sea Shepherd meiddust þegar til átaka kom á milli þeirra og japanskra hvalveiðimanna við suðurskautið, eða um 3.200 km sunnan við Tasmaníu í Ástralíu. Hvalveiðimennirnir beittu vatnsþrýstidælum á liðsmenn samtakanna, auk þess sem þeir köstuðu járnstykkjum og golfkúlum í þá.

Samtökin Sea Shepherd eru þekkt fyrir baráttu sína gegn hvalveiðum. Reglulega skerst í odda milli þeirra og japanska hvalveiðiflotans við suðurskautið. Samtökin sendu þyrlu og tvo uppblásna báta sem sigldu í átt að einu hvalveiðiskipanna.

Hvalveiðimennirnir brugðust fljótt við með vatnsdælunni. Að sögn Paul Watson, leiðtoga Sea Shepherd, meiddist einn félagi í samtökum þegar hann féll aftur fyrir sig. Hann hlaut skurð og marbletti. Annar mótmælandi fékk járnbút í andlitið. Að sögn Watson var hann með hjálm, en það kom ekki í veg fyrir mar.

Þá segir Watson í samtali við AP-fréttastofuna að hvalveiðimennirnir hafi notað hljóðvopn sem varð þess valdandi að liðsmenn Sea Shepherd hafi misst heyrn um stund og fjölmargir köstuðu upp.

• 3 blogg um fréttina

Bloggað um fréttina

• Ásgrímur Hartmannsson: Hvar fæ ég svona hljóðvopn?
• Magnús Vignir Árnason: Auðnuleysingjar
• Sigurbrandur Jakobsson: Sea Shepherd en að trufla hvalveiðar