Erlent | mbl | 2.5.2010 | 8:40

Óttast það versta

Lítið miðar í að stöðva olíulekann á Mexíkóflóa og óttast sérfræðingar það versta ef golfstraumurinn flytur olíubrákina í átt að Atlantshafinu. Viðbrögð stjórnvalda og olíufélagsins BP eru harðlega gagnrýnd þar sem talið er að ef fyrr hefði verið brugðist við hefði verið hægt að afstýra því stórslysi sem nú blasir við. Þetta kemur fram í bandaríska dagblaðinu Washington Post í morgun.

Forseti Bandaríkjanna, Barack Obama, ætlar að heimsækja strönd Mexíkóflóa í dag.

Óttast ýmsir á svæðinu um framtíð sína enda ljóst að áhrifin eru gríðarleg á allan sjávarútveg og efnahag svæðisins almennt. „Þetta fólk, við höfum verið lamin niður, hörmungar eftir hörmunar," segir Matt O'Brien í viðtali við WP en viðskipti hans með rækju eru í hættu vegna olíulekans.

Bobby Jindal, ríkisstjóri Louisiana, mun hitta Obama í dag en Jindal hefur hótað því að allri ábyrgð verði varpað á BP sem var með olíuborpallinn á leigu. Sprenging varð á pallinum þann 22. apríl sl. og fórust ellefu starfsmenn í henni. Forstjóri BP, Tony Hayward, mun koma til Louisiana í dag og fara yfir stöðuna.

Óttast er að tjónið nú sé enn meira heldur en þegar risaolíuskipið Exxon Valdez strandaði undan strönd Alaska árið 1989 og olli mestu olíumengun í sögu Bandaríkjanna. Þegar hefur verið lýst yfir neyðarástandi í fjórum ríkjum: Mississippi, Alabama, Louisiana og Flórída.