Sameinuðu þjóðirnar gagnrýndu í dag harðlega þá ákvörðun sýrlenskra ráðamanna að boða til forsetakosninga í Sýrlandi þann 3. júní næstkomandi í skugga mannskæðrar borgarastyrjaldar.
Stephane Dujarric, talsmaður Sameinuðu þjóðanna, sagði við fjölmiðla í dag að bæði Ban Ki-Moon, framkvæmdastjóri Sameinuðu þjóðanna, og Lakhdar Brahimi, sem er erindreki samtakanna í landinu, hefðu varað við því að boðað yrði til kosninga á þessari stundu.
Þeir segja að kosningarnar muni valda pólitískri upplausn og koma í veg fyrir að lausn finnist á því ófremdarástandi sem ríkir í landinu, að sögn Dujarric.
Hann bætti því jafnframt við að slíkar kosningar myndu ekki samrýmast Genfarsáttmálanum, eftir því sem fram kemur í frétt AFP um málið.
Að minnsta kosti 150 þúsund manns hafa fallið frá því borgarastyrjöldin braust út í marsmánuði árið 2011.
„Forsetakosningar í Sýrlandi munu fara fram 3. júní á milli kl. 7 að morgni til sjö að kvöldi,“ sagði forseti þingsins, Mohammad al-Lahham, á sérstökum þingfundi fyrr í dag.
Stjórnarandstæðingar í landinu hafa einnig fordæmt ákvörðunina og segja hana vera farsa. Alþjóðasamfélagið ætti ekki að virða kosningarnar að vettugi.