Þýska lögreglan fann geðlyf á heimili Andreas Lubitz, flugmannsins sem grandaði farþegaflugvél Germanwings í frönsku ölpunum.
Rannsóknarlögreglumenn sem leituðu á heimili hans í Duesseldorf fundu fjölda lyfja sem notuð eru til meðferðar á geðrænum veikindum. Þetta kemur fram í þýska blaðinu Welt am Sonntag weekly í dag.
„Hinn 27 ára gamli Lubitz hefur verið í meðferð hjá nokkrum geðlæknum og sálfræðingum,“ er haft eftir ónefndum rannsakenda málsins í fréttinni.
Þá kemur fram að ekkert bendi til þess að Lubitz hafi átt við áfengis- eða fíkniefnavanda að stríða. Hann hafi þó verið undir miklu álagi og var mjög þunglyndur samkvæmt persónulegum bréfum sem fundust á heimili hans.
AFP fréttastofan segir franska og þýska rannsakendur málsins hafa neitað að tjá sig um málið.
Þýskir saksóknarar segja Lubitz hafa falið veikindi sín frá flugfélaginu, en læknar höfðu mælst til þess að hann færi í veikindaleyfi á þeim tíma sem slysið varð. Á föstudag fundust á heimili hans læknisvottorð sem búið var að rífa.
Lubitz leitaði tvisvar á sjúkrahús nýverið. Í febrúar leitaði hann álits læknis vegna sjúkdómsgreiningar. Síðari heimsóknin var þann 10. mars.
Talið er að Lubitz hafi lækkaði flug vélarinnar vísvitandi og í kjölfarið brotlent vélinni. Flugstjórinn hafði brugðið sér á klósettið eftir að vélin náði fullri flughæð, 38 þúsund fetum. Hann komst aldrei aftur inn í flugstjórnarklefann þrátt fyrir ítrekaðar tilraunir.