Erlent | AFP | 1.10.2015 | 11:45 | Uppfært 13:14

Réðust á íslamska uppreisnarmenn

Mynd sem rússneska varnarmálaráðuneytið birti í gær sem er sögð sýna loftárásir flughersins á skotmark í Sýrlandi. AFP

Rússar héldu loftárásum sínum í Sýrlandi áfram í nótt. Sjálfir segjast þeir hafa látið til skarar skríða gegn Ríki íslams en heimildarmaður AFP-fréttastofunnar úr röðum sýrlenskra öryggissveita segir loftárásirnar hafa beinst að bandalagi íslamskra uppreisnarmanna sem er algerlega andsnúið Ríki íslams.

AFP hefur eftir heimildarmanni sínum að Rússar hafi ráðist á bækistöðvar Landvinningahersins í Jisr al-Shughur og Jabal al-Zawiya í Idlib-héraði. Herinn hefur lagt undir sig allt héraðið og sótt fram í átt að Latakia, höfuðvígi Bashar al-Assad, forseta. Samtökin eru harðir andstæðingar Ríkis íslams sem Rússar segjast þó beina spjótum sínum að. Innan þeirra raða eru meðal annars systursamtök al-Qaeda.

Í yfirlýsingu frá varnarmálaráðuneyti Rússlands er því haldið fram að rússneskar herþotur hafi varpað sprengjum á fjögur skotmörk sem tengjast Ríki íslams, þar á meðal stjórnstöð samtakanna og vopnageymslu. Þá er því haldið fram að bílsprengjuverksmiðja norðan af borginni Homs hafi verið sprengd upp.

Loftárásir Rússa í Sýrlandi hófust í gær en Assad forseti hafði óskað eftir hernaðaraðstoð þeirra. Rússnesk stjórnvöld hafa sagst vera að leggja baráttunni gegn Ríki íslams lið en strax í gær komu fram ásakanir um að árásir þeirra hafi alls ekki beinst að hryðjuverkasamtökunum heldur að uppreisnarmönnum sem berjast gegn Assad og eru jafnvel óvinir Ríkis íslams.